धरणगाव : प्रतिनिधी
धरणगावनजीक पवार पेट्रोल पंपाजवळ आयशरने दुचाकीला धडक दिली. या अपघातात दुचाकीस्वाराचा मृत्यू झाला तर दुचाकीवरील दोघेही जखमी झाले. ही घटना गुरुवारी पहाटे साडेपाच ते सहा वाजेच्या सुमारास घडली.
मिळालेल्या माहितीनुसार, साळवा येथील माजी ग्रामपंचायत सदस्य मोरेश्वर लोटू अत्तरदे (५८) भाऊ, मुलगा, मुलगी हे नागपूरहून रेल्वेने धरणगाव रेल्वेस्थानकावर आले. त्यांना घेण्यासाठी मोरेश्वर अत्तरदे हे धरणगावला आले होते. लहान मुलांना सोबत घेवून दुचाकीने साळव्याकडे जात असताना धरणगावच्या बाहेर चोपडा रस्त्यावरील पवार पेट्रोल पंपाजवळ समोरून येणाऱ्या आयशरने जोरदार धडक दिली.
या अपघातात दुचाकीस्वार गंभीर जखमी झाल्याचे पाहून आयशर चालकाने घटनास्थळावरून धूम ठोकली. दरम्यान गंभीर जखमी मोरेश्वर अत्तरदे यांना पुढील उपचारासाठी जळगावला आणत असताना रस्त्यातच त्यांचा मृत्यू ओढविला. तर दुचाकीवरील मुलगा व मुलगी दोघांना नागरिकांनी दवाखान्यात दाखल केले त्यांच्यावर उपचार सुरू असून प्रकृती धोक्याबाहेर असल्याचे वैद्यकीय सूत्रांनी सांगितले. मयत मोरेश्वर अत्तरदे हे अविवाहित होते. पश्चात वडील, भाऊ, असा परिवार आहे
