जळगाव : प्रतिनिधी
जळगाव – छत्रपती संभाजी नगर महामार्गावरील रेमंड चौफुली परिसरात भरधाव वेगाने जाणाऱ्या कारने दुचाकीला कट मारल्याने दुचाकीचा अपघात झाला. यामध्ये दोघे दुचाकीस्वार रस्त्यावर पडल्याने त्यांना गंभीर दुखापत झाल्याची घटना रविवारी सायंकाळी ५ वाजेच्या सुमारास घडली. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, जळगाव शहरातील मकरंद कॉलनीत हर्षल शिरीष भंडारी (वय ३९) हे वास्तव्यास आहे. ते त्यांचा मित्र संजय नामदेव साठे यांच्यासोबत राष्ट्रीय महामार्गावरील रेमंड चौफुलीजवळून (एमएच १२, एफएच ४४४९) क्रमांकाच्या दुचाकीने जात होते. भरधाव वेगाने जाणाऱ्या (एमएच २८, बीडब्ल्यू ०२७३ ) क्रमांकाच्या कारने भंडारी यांच्या दुचाकीला कट मारला. त्यात दुचाकी खाली पडली व त्यात दोघांना मार लागून जखमी झाले. तसेच दुचाकीचेही नुकसान झाले. या प्रकरणी हर्षल भंडारी यांनी एमआयडीसी पोलिस ठाण्यात फिर्याद दिली. त्यावरून कारचालकाविरुद्ध गुन्हा दाखल करण्यात आला आहे. पुढील तपास पोलिस नाईक पंकज पाटील करीत आहेत.
