मुंबई : वृत्तसंस्था
भिवंडी तालुक्यातील धामणगाव एक धक्कादायक घटना घडली आहे. मित्रांसोबत तळ्यात पोहायला गेलेल्या एका बालकाचा आणि मुलीचा तलावाच्या पाण्यात बुडून मृत्यू झाला. ही दुर्दैवी घटना रविवारी सायंकाळी उशिरा घडल्याची माहिती पाेलीसांनी दिली. या घटनेत वसीम मलिक (वय 7 राहणार. फातिमा नगर) व अंजुम फत्ते मो.रफिक (वय 12 राहणार. धामणगाव धापशी पाडा) यांचा मृत्यू झाल्याची माहिती पाेलीसांनी दिली.
घटनास्थळावरुन मिळालेल्या माहिती नुसार भिवंडी शहरातील फातिमा नगर येथील आठ वर्षांचा वसीम हा तालुक्यातील वडपा धामण गाव धापशीपाडा येथे आपल्या नातेवाईकांकडे गेला होता. यावेळी वसीम आपली नातेवाईक असलेली बारा वर्षांची मुलगी अंजुम व इतर दोन साथीदारांसह वडपा धामणगाव येथे तलावात पोहोचण्यासाठी उतरले. यावेळी पाण्याचा अंदाज न आल्याने दोघेही पाण्यात बुडाले. यावेळी बाजूला उभ्या असलेल्या दोन साथीदारांनी आरडाओरड केल्याने तेथून जाणाऱ्या एका वाहन चालकाने मुलांचा आवाज ऐकून घटनास्थळी धाव घेतली. त्याने पाण्यातून मुलांना बाहेर काढत उपजिल्हा रुग्णालयात दाखल केले. मात्र उपचारापूर्वीच दोघांचाही मृत्यू झाल्याचे वैद्यकीय अधिका-यांनी सांगितले. या घटनेत वसीम मलिक (वय 7 राहणार. फातिमा नगर) व अंजुम फत्ते मो.रफिक (वय 12 राहणार. धामणगाव धापशी पाडा) यांचा मृत्यू झाल्याची माहिती पाेलीसांनी दिली. या प्रकरणी भिवंडी तालुका पोलीस ठाण्यात अकस्मित मृत्यूची नोंद करण्यात आली आहे. या घटनेने परिसरात हळहळ व्यक्त केली जात आहे.
