जळगाव : प्रतिनिधी
एका कंपनीद्वारे शेअर मार्केटमध्ये गुंतवणूक केल्यास जादा नफा मिळेल, असे आमिष दाखवून रावेर येथील भूषण हाटे यांना ९ लाख ३० हजार रुपयांचा ऑनलाइन गंडा घालणाऱ्या सायबर ठगाला सायबर पोलिसांनी गुजरात राज्यातील भावनगर येथून बेड्या ठोकल्या आहेत. त्याच्याजवळून ५ लाख रुपयांची रक्कम हस्तगत करण्यात आली आहे. रावेर तालुक्यातील भूषण हाटे यांना एप्रिल महिन्यात सायबर ठगाने शेअर मार्केटमध्ये गुंतवणूक केल्यास मोठ्या प्रमाणावर नफा मिळवून देण्याच्या नावाखाली तब्बल ९ लाख ३० हजारांची ऑनलाइन फसवणूक केली होती. याप्रकरणी सायबर पोलिसात गुन्हा दाखल झाला होता.
पोलिसांनी भूषण यांचे व्हॉट्सअॅप आणि बँकेतील झालेल्या व्यवहाराच्या मदतीने संशयित आरोपीचा शोध सुरू केला. दरम्यान, तो गुजरात राज्यातील भावनगर येथील असल्याचे निष्पन्न झाले. त्यानुसार सायबर पोलिस ठाण्याचे पोलिस निरीक्षक अशोक उत्तेकर यांच्या मार्गदर्शनाखाली पोलिस उपनिरीक्षक दिगंबर थोरात, प्रवीण वाघ, दिलीप चिंचोले, गौरव पाटील यांच्या पथकाने सायबर ठग विजय ऊर्फ अजय दयाभाई कलसरिया (३३, रा. अम्रेली, भावनगर, गुजरात) याला रविवारी अटक केली. त्याच्याकडून फसवणुकीपैकी ५ लाख रुपये हस्तगत केले आहे.
