यावल : प्रतिनिधी
तालुक्यातील न्हावी गावात एका किराणा दुकानावर रविवारी पहाटे तीन वाजता छापा टाकून पोलिसांनी तब्बल साडेसात लाखांचा गुटखा जप्त केला. यात विक्की माखिजा (वय ३९) याला अटक करण्यात आली आहे.
मिळालेल्या गुप्त माहितीवरून उपविभागीय पोलीस अधिकारी सतीश कुलकर्णी व सहायक पोलिस निरीक्षक नीलेश वाघ यांच्या पथकाने न्हावी येथील सुनील किराणा या दुकानावर छापा टाकला. त्यात दुकानांमध्ये विविध प्रकारचा गुटखा, पान मसाला गोण्यांमध्ये भरलेला आढळून आला. याची किंमत तब्बल सात लाख ३१ हजार रुपये असल्याचे पोलिसांनी सांगितले. या प्रकरणी गुन्हा दाखल करण्यात आला आहे. फौजदार मसलोद्दीन शेख तपास करीत आहेत. गुटखा बंदी असूनही सर्रास गुटखा उपलब्ध होत आहे. तालुक्यात गुटखा येतो कोठून तसेच या व्यवसायातील बड्या धेंडांवर कारवाई व्हावी अशी चर्चा या कारवाईनंतर होत आहे.
