जळगाव : प्रतिनिधी
अमळनेर शहरातील गांधलीपुरा भागातील चार वेळा हद्दपार झालेला सराईत गुन्हेगार काजल उर्फ रशीद शेख (वय ३७) याच्यावर पोलिसांनी एमपीडीए कारवाई करून पहाटेच अमरावती मध्यवर्ती कारागृहात रवाना केले आहे. पोलिस निरीक्षक विजय शिंदे यांनी पदभार घेताच पाच महिन्यात चार सराईत गुन्हेगारांवर एमपीडीए कारवाई झाली आहे.
काजल उर्फ रशीद शेख हा सराईत गुन्हेगार समजला जात होता. चार वेळा हद्दपार, पाच वेळा प्रतिबंधात्मक कारवाई सह त्याच्यावर जबरी चोरी करणे, खंडणी मागणे, धारदार शस्त्र, बंदुकीचा वापर, स्फोटक पदार्थ बाळगणे, जातीयवादीगुन्हे करणे, दंगल माजवणे, शासकीय कामात अडथळे निर्माण करणे, तसेच आदेशाचे पालन न करणे, जुगार, धमकावणे असे विविध प्रकारचे २७ गुन्हे दाखल आहेत.
