जळगाव : प्रतिनिधी
जळगाव शहरातील एका परिसरात चोरट्यांनी बंद घराचे दरवाज्याचे कुलूप तोडून तब्बल ४ लाखांच्या दागिन्यासह रोकड लंपास केल्याची घटना उघडकीस आली आहे. या प्रकरणी रामानंद पोलिसात गुन्हा दाखल करण्यात आला आहे.
पोलिसांनी दिलेल्या माहितीनुसार, शहरातील पार्वती नगरातील अभिराम अपार्टमेंट मधील रहिवासी स्नेहल सौरभ फडके(वय ३८) हे दि.१४ रोजी आपल्या घराच्या दरवाज्याला कुलूप लावून बाहेर गावी गेले असता. दि १४ ते १७ रोजी दरम्यान अनोळखी चोरट्यांनी या बंद घराचे कुलूप तोडून घरातील ८० हजार रुपये किमतीचा सोन्याचा हार, ६५ हजार किमतीच्या सोन्याच्या अंगठ्या, ८० हजार रुपये किमतीच्या २ सोन्याच्या चैन, ३५ हजार किमतीच्या ३ जोड सोन्याचे कानातले, १ लाख रुपये किमतीचे २ किलो वजनाचे चांदीचे ताट, समई, निरंजन, शिक्के यासह २५ हजार रुपयांचा कॅमेरा, १५ हजारांची रोकड असा एकूण ४ लाख रुपयांच्या ऐवजावर चोरट्यांनी डल्ला मारला आहे. या प्रकरणी महिलेने रामानंद नगर पोलिसात धाव घेत अनोळखी चोरट्याविरोधात गुन्हा दाखल केला आहे. घटनास्थळी प्रभारी उपविभागीय पोलीस अधिकारी संदीप गावित, पोलीस निरीक्षक शिल्पा पाटील यांनी घटनास्थळी भेटून देवून पाहणी केली आहे. तर पुढील तपास सपोनि. रोहीदास गभाले हे करीत आहेत.
