अमळनेर : प्रतिनिधी
शहरातील एका परिसरात लग्नाच्या वरातीत डीजेच्या गाण्यावर ताल धरत नवरदेवाने चक्क हातात तलवार घेऊन उपस्थित नागरिकांमध्ये दहशत निर्माण केल्याप्रकरणी नवरदेवासह दोन इसमाविरोधात अमळनेर पोलीस स्थानकात गुन्हा दाखल करण्यात आला आहे.
पोलिसांनी दिलेल्या माहितीनुसार, शहरातील भोईवाडा परिसरात मंगळवारी १६ मे विकी गोपाल कोळी उर्फ अहिरे यांचे लग्न होते. दुपारी अडीच वाजेच्या सुमारास लग्नाची वरात जात असतांना नवरदेव विकी कोळी याने हातात तलवार घेऊन मित्रांसोबत नाचत होता. त्यावेळी एका हातात तलवार व दुसऱ्या हातात म्यान दाखवून आणि दोन समाजाता जातीय तेढ निर्माण होईल असे गाणे वाजवून दहशत निर्माण केल्याचा प्रकार घडला होता. याप्रकरणी पोलीस कॉन्स्टेबल जितेंद्र निकुंभे यांनी दिलेल्या फिर्यादीवरून संशयित आरोपी तथा नवरदेव विकी गोपाल कोळी, किरण गोपाल कोळी, डीजे चालक यशवंत शांताराम शिंगाने तिघे रा. भोईवाडा अमळनेर आणि विकी भाऊलाल कोळी रा. शिरपूर या चार जणांना विरोधात अमळनेर शहर पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस हेडकॉन्स्टेबल संजय पाटील करीत आहे.
