जळगाव : प्रतिनिधी
जळगाव तालुक्यातील धानवड गावाजवळील तलावामध्ये मित्रांसोबत पोहण्यासाठी गेलेल्या करण जयराम पवार (११, रा. चिंचोली) या बालकाचा बुडून मृत्यू झाल्याची दुर्देवी घटना सोमवारी दुपारी ४ वाजता घडली. दरम्यान, सायंकाळी मृतदेह जिल्हा रुग्णालयात आणल्यानंतर कुटूंबीयांसह ग्रामस्थांची गर्दी झाली होती. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
मिळालेल्या माहितीनुसार, सोमवारी दुपारी चिंचोली येथील करण हा गावातील आपल्या दोन सवंगड्यांसोबत धानवड गावाजवळील तलावात पोहण्यासाठी गेला. करण हा खोल पाण्यात गेल्याने तो बुडाला. तलावात गाळ असल्यामुळे तो वर येवू शकला नाही. त्यामुळे अन्य दोघांनी आरडा-ओरड गेली. आरडा-ओरड एकून जवळच काम करणाऱ्या लोकांनी घटनास्थळी धाव घेतली. तोपर्यंत करण याचा बुडून मृत्यू झाला होता. त्या लोकांनी तलावात उडी मारून करण याला बाहेर काढले. त्यानंतर तत्काळ त्याला वाहनातून रुग्णालयात हलविले. याठिकाणी वैद्यकीय अधिकाऱ्यांनी तपासणीअंती त्याला मृत घोषित केले. मुलाचा बुडून मृत्यू झाल्याचे कळताच वडील जयराम पवार यांनी एकच आक्रोश केला. मुलाच्या मृत्यूमुळे त्यांना मोठा धक्का बसला.
