जळगाव : प्रतिनिधी
शहरातील एका परिसरातील ३० वर्षीय महिलेस एकाने दारू पिण्यासाठी पैसे मागितले ते पैसे न दिल्याने महिलेच्या डोक्यात विट मारून दुखापत केल्याची घटना घडली आहे. या प्रकरणी शहर पोलिसात गुन्हा दाखल करण्यात आला आहे.
मिळालेल्या माहितीनुसार, शहरातील छत्रपती शिवाजी नगर परिसरातील धनाजी नाना काळे नगरात सोनाली दिनेश अकुले (वय ३०) या घरकाम करीत असून दि.७ रोजी दुपारी ४.३० वाजेच्या सुमारास महिलेच्या राहत्या घरात घुसून संशयित आरोपी गणेश सानप याने शिवीगाळ करून दारू पिण्यास पैसे न दिल्याच्या रागातून सोनाली यांच्या डोक्यात विट मारून दुखापत केली. याप्रकरणी सोनाली अकुले यांनी दिलेल्या फिर्यादीवरून आरोपीविरुद्ध शहर पोलीस स्टेशनला गुन्हा दाखल करण्यात आला असून तपास पोहेकॉ संजय झाल्टे करीत आहे.
