जळगाव : प्रतिनिधी
आसोदा शिवारातील डाउन रेल्वेलाइनवर धावत्या रेल्वेतून पडून बाबूभाई माणखाँ पठाण (६९, रा. नगरसूल, ता. येवला, जि. नाशिक) या वृद्धाचा मृत्यू झाल्याची घटना शुक्रवारी दुपारी घडली. याप्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
रसूल येथील बाबूभाई पठाण हे शुक्रवारी रेल्वेतून प्रवास करीत होते.
आसोदा शिवारातील डाउन रेल्वेलाइनवरील खांबा क्रमांक ४२६/१ ते ३ च्या दरम्यान ते धावत्या रेल्वेतून पडल्याने त्यांचा जागीच मृत्यू झाला. ही घटना तालुका पोलिस ठाण्यातील विलास शिंदे व माणिक सपकाळे यांना कळाल्यानंतर त्यांनी घटनास्थळी धाव घेतली. मृतदेहाची अंगझडती घेतल्यानंतर खिश्यामध्ये आधार कार्ड, मतदान कार्ड मिळून आल्यानंतर मृतदेहाची ओळख पटली. शिंदे यांनी लागलीच येवला पोलिसांना संपर्क साधून नातेवाइकांचा शोध घेण्यास सांगितले. त्यानंतर येवला पोलिसांनी पठाण यांच्या नातेवाइकांचा शोध घेतल्यानंतर नातवाशी संपर्क झाला. शिंदे यांनी लागलीच पठाण यांचा नातू इरफान याच्या मोबाइलवर मृतदेहाचे फोटो पाठविल्यानंतर त्याने त्याच्या आजोबांना ओळखले. दरम्यान, मृतदेह जिल्हा रुग्णालयात हलविण्यात आला. याप्रकरणी तालुका पोलिस अकस्मात मृत्यूची नोंद करण्यात आली आहे.
