जळगाव : प्रतिनिधी
दुकान बंद करून पायी घरी निघालेल्या महेंद्र रामलाल कोंडे (३८, रा. धनगरवाडा, पिंप्राळा) या तरुणाला सात जणांनी रस्त्यात अडवून मारहाण करत सोन्याची अंगठी व एक हजार रुपये रोख चोरून नेल्याचा प्रकार पिंप्राळ्यातील मढी चौके येथे सोमवारी रात्री १०:३० वाजेच्या सुमारास घडला. याप्रकरणी मंगळवारी रामानंदनगर पोलिस ठाण्यात गुन्ह्याची नोंद करण्यात आली आहे.
महेंद्र कोंडे हे सोमवारी रात्री १०:३० वाजेच्या सुमारास त्यांचे दुकान बंद करून पिंप्राळ्यातील भवानी मंदिराकडून मढी चौकमार्गे पायी घरी जात होते.
मढी चौकात आल्यानंतर त्यांना सात जणांनी रस्त्यात अडवून एकाने त्यांना तुझ्या खिशात किती पैसे आहे, ते सगळे काढ, असे धमकावले. पण कोंडे यांनी त्याचा विरोध केल्यानंतर काहींनी त्यांना पकडून ठेवले. नंतर एकाने त्यांच्या खिशातील एक हजार रुपये रोख तर दुसऱ्याने हातातील २१ हजार रुपये किमतीची सोन्याची अंगठी बळजबरीने काढून घेत पळून गेले. कोंडे यांनी मंगळवारी रामानंदनगर पोलिस ठाणे गाठून तक्रार दिली. त्यानुसार सात जणांविरुद्ध गुन्ह्याची नोंद करण्यात आली आहे.
