अमळनेर : प्रतिनिधी
शहरासह तालुक्यातील सावखेडा येथे झालेल्या खुनानंतर जिल्ह्यात खळबळ उडाली आहे. पहिल्या घटनेत अमळनेरात स्पीकरचा आवाज कमी करण्यावरून झालेल्या वादातून चाकूने भोसकून तरुणाची हत्या करण्यात आली तर दुसर्या घटनेत अमळनेर तालुक्यातील सावखेडा गावात दारूच्या नशेत असतांना झालेल्या वादात तरूणाची कुर्हाडीने वार करून हत्या करण्यात आली. ही धक्कादायक घटना सोमवार २४ एप्रिल रोजीच्या रात्री घडली.
अमळनेर शहरातील दाजीबानगरात कार्यक्रमात सुरू असलेला लाउडस्पीकरचा आवाज कमी करण्याच्या कारणावरून अक्षय राजू भील (21) या तरुणावर सोमवार, 24 एप्रिल रोजी रात्री पाच ते सहा जणांनी चाकू भोसकून गंभीर जखमी केले. त्याला धुळे येथील शासकीय रूग्णालयात उपाचारार्थ दाखल केले असता उपचारादरम्यान त्याची प्राणज्योत मालविली.
दुसरी घटना अमळनेर तालुक्यातील सावखेडा गावातील वैदूवाड्यात सोमवारी रात्री 12.30 वाजेच्या सुमारास घडली. नाना मंगलसिंग बारेला (21) या तरुणाला वैयक्तिक वादातून संशयित आरोपी डेबूजी सुरसिंग बारेला (22) याने कुर्हाडीने वार करून संपवले. खुनाची माहिती मिळाल्यानंतर अमळनेर पोलीस ठाण्याचे पोलीस उपनिरीक्षक नरसिंग वाघ, हवालदार सुनील जाधव, राहुल पाटील यांनी सावखेडा गावातील खून प्रकरणात संशयित आरोपी डेबूजी सुरसिंग बारेला याला ताब्यात घेतले आहे. या दोन्ही घटनेमुळे जळगाव जिल्हा हादरला आहे. या प्रकरणी अमळनेर पोलीस ठाण्यात गुन्हा दाखल करण्याची प्रक्रिया सुरू असल्याची माहिती सूत्रांनी दिली.
