नवी दिल्ली : वृत्तसंस्था
उत्तर प्रदेशात तीन दशकांपासून दहशत असलेल्या प्रयागराज पश्चिम भागातच अतीक अहमदची भावासह निर्घृण हत्या करण्यात आली. पोलिसांच्या ताब्यात असताना प्रसारमाध्यमांशी बोलतानाच दोघा भावांच्या कानशिलावर पिस्तूल ठेवून गोळ्या घालण्यात आल्या.
दोघांनाही वैद्यकीय तपासणीसाठी घेऊन जात असताना प्रयागराज वैद्यकीय महाविद्यालयाजवळ त्यांच्यावर गोळ्या झाडण्यात आल्या. या हल्यात दोघांचाही मृत्यू झाला आहे. दरम्यान, याप्रकरणी उत्तर प्रदेश पोलिसांनी तिघांना ताब्यात घेतलं असल्याची प्राथमिक माहिती आहे.
गुंड अतिक अहमद हा २००५ मधील बसपा आमदार राजू पाल हत्याकांड आणि फेब्रुवारीमध्ये झालेल्या उमेश पाल हत्याकांडातील प्रमुख आरोपी होता. तसेच अतिक अहमदवर उत्तर प्रदेशमध्ये अनेक गंभीर गुन्ह्यांची नोंद आहे. यामध्ये खून, खंडणी अशा गंभीर गुन्ह्यांचा समावेश आहे.
दरम्यान, दोन दिवसांपूर्वी अतिकचा मुलगा असद अहमद आणि शूटर गुलामलाही झाशीमध्ये उत्तर प्रदेश पोलिसांनी ठार केले होते. दोघेही उमेश पाल हत्याप्रकरणातील प्रकरणातील मुख्य आरोपी होते. उत्तर प्रदेश पोलिसांनी दोघांना हत्यारं टाकून आत्मसमर्पण करण्यास सांगितले. मात्र, त्यांनी पोलिसांवर गोळीबार सुरू केला. या चकमकीत दोघांचाही मृत्यू झाला होता.
