नवी दिल्ली : वृत्तसंस्था
उत्तर प्रदेशातील हरदोई वैद्यकीय महाविद्यालयाच्या अतिदक्षता विभागात आलेल्या तरुणामुळे सगळेजण चक्रावले होते. वेदनेने विव्हळणाऱ्या या युवकाने जे डॉक्टरांना सांगितले त्यावर त्यांचा विश्वासच बसत नव्हता. या तरुणाने डॉक्टरांना सांगितले की त्याच्या गुप्तांगातून साप घुसला आणि तो पोटात शिरला आहे. हे ऐकून चक्रावलेल्या डॉक्टरांनी ताबडतोब या तरुणाला दाखल करून घेत चाचण्या करण्यास सुरूवात केली.
या तरुणाचं वय 25 वर्षे असून तो बनियानी पुरवा गावचा रहिवासी आहे. मनीष (तरुणाचे बदललेले नाव) सोमवारी संध्याकाळी उशिरा पोट रिकामं करण्यासाठी परसाकडेला गेला होता. काहीवेळातच मनीष घरी ओरडत परतला होता. मनीषने त्याच्या भावाला सांगितलं की त्याच्या पोटामध्ये काळ्या रंगा किडा गेला आहे. तो किडा साप असावा असा संशय मनीषने बोलून दाखवला होता. यामुळे मनीषला घेऊन त्याच्या घरचे रुग्णालयात पोहोचले होते. डॉक्टरांनी मनीषला तपासलं तेव्हा त्यांनी सांगितलं की मनीष नशेच्या अंमलाखाली आहे. मनीषवर इलाज करणाऱ्या डॉक्टरांनी सांगितलं शौचालयाला बसताना मनीषच्या गुप्तांगात काठी घुसली होती. त्यामुळे रक्त यायला लागलं होतं. नशेत असल्याने त्याला वाटलं की सापाने त्याला चावलं असून साप त्याच्या पोटात घुसला आहे. प्रत्यक्षात त्याच्यासोबत असं काहीही झालं नसल्याचं डॉक्टरांनी सांगितले.
