जळगाव : प्रतिनिधी
शिरसोलीदरम्यान धावत्या रेल्वेतून पडल्याने वरखेडी येथील तरुणाचा जागीच मृत्यू झाल्याची घटना शनिवारी सायंकाळी ५ वाजता घडली आहे. याबाबत जळगाव रेल्वे पोलिस ठाण्यात अकस्मात मृत्यूची नोंद करण्यात आली आहे. इजास रसूल काकर (वय २७, रा. वरखेडी ता. पाचोरा) असे मृत तरुणाचे नाव आहे. इजास रसूल काकर हा आपल्या परिवारासह वास्तव्याला होता. भांडे विक्री करून आपला उदरनिर्वाह करीत होता. शनिवारी दुपारी सुरत जाण्यासाठी इजास हा पाचोरा येथून जळगावला येण्यासाठी मेमू ट्रेनने बसला होता. सायंकाळी ५ वाजेच्या सुमारास शिरसोली ते जळगाव रेल्वे रूळ दरम्यान धावत्या रेल्वेतून खाली पडल्याने त्याचा जागीच मृत्यू झाला. जळगाव रेल्वे पोलिसांनी मृतदेहाचा पंचनामा केला. त्याच्याजवळील मोबाईलच्या आधारे ओळख पटली.
त्याचा मृतदेह जिल्हा शासकीय वैद्यकीय महाविद्यालयात दाखल केला. रविवारी शवविच्छेदन करून मृतदेह नातेवाइकांच्या ताब्यात देण्यात आला. मयताच्या पश्चात आई जुबेदाबी, पत्नी रिजवानाबी, ८ महिन्यांची मुलगी उमेन व भाऊ अरबाज असा परिवार आहे. या घटनेबाबत जळगाव रेल्वे पोलिस ठाण्यात अकस्मात मृत्यूची नोंद करण्यात आली. पुढील तपास रेल्वे पोलिस कर्मचारी सचिन भावसार करीत आहेत.
