अमळनेर : प्रतिनिधी
अमळनेरातील गोकलानी कुटुंबीयांनी लग्नासाठी त्यांच्या होणाऱ्या सुनेला अहमदनगर येथून चक्क हेलिकॉप्टरने अमळनेरात आणले आहे. या गोष्टीची संपूर्ण राज्यात चांगलीच चर्चा रंगली असल्याचं पाहायला मिळत आहे. अमळनेर येथील प्रसिद्ध बांधकाम व्यावसायिक सरजू गोकलानी यांच्या एकुलत्या एक मुलाचा आशिष यांचा विवाह अहमदनगर येथील प्रसिद्ध उद्योजक संजय चंदानी यांची मुलगी सिमरन हिच्याशी आज शुक्रवार, १० फेब्रुवारी रोजी अमळनेर शहरात पार पडत आहे.
आशिष हा इंजिनियर आहे तर सिमरन चंदानी ही सुद्धा उच्चशिक्षित मुलांच्या शिक्षण पद्धतीवर आधारित असलेल्या एका प्रसिद्ध कंपनीच्या एज्युकेशन ॲपमध्ये संचालक पदावर कार्यरत आहेत. एकुलता एक मुलगा असल्याने विवाह शाही थाटात व्हावा होणाऱ्या सुनबाईला तिच्या गावावरून हेलिकॉप्टरने लग्नाच्या ठिकाणी आणणार असं स्वप्न सरजू गोकलानी यांनी बघितलं होतं. त्यानुसार त्यांनी सुनबाईला तसेच तिच्या कुटुंबियांना न कळवता गुरुवारी थेट सुनबाईला लग्नाच्या ठिकाणी अमळनेर येथे आणण्यासाठी हेलिकॉप्टरची व्यवस्था केली. हेलिकॉप्टर पाठवून आशिषने व त्याच्या वडिलांनी नवरी मुलगी सिमरन व तिच्या कुटुंबियांना आश्चर्याचा धक्का दिला. अहमदनगर येथून चक्क हेलिकॉप्टर मध्ये बसून नवरी मुलगी सिमरन व तिच्या कुटुंबियांचे अंमळनेर आगमन झाले. ज्या ठिकाणी हेलिकॉप्टर उतरले त्या ठिकाणी सिमरनच्या स्वागतासाठी जय्यत तयारी करण्यात आली होती. यानंतर दोघेही जोडपे सुरुवातीला अमळनेर येथील मंगळ ग्रह मंदिरावर दर्शनासाठी गेले या ठिकाणी त्यांनी हेलिकॉप्टर मधून मंदिरावर पुष्पृष्टी करत सर्वांचेच लक्ष वेधले. सिमरन हिला सूनबाई समजून नव्हे तर मुलगी समजून तिचा स्वीकार करत असल्याचे सरजु गोकलानी हे बोलताना सांगतात.
हेलिकॉप्टर आल्याने सिमरन हिचा सुद्धा आनंद गगनात मावत नव्हता. तिला आनंद शब्दात व्यक्त करता येत नव्हता. आपलं लग्न हे अनोख्या पद्धतीने व्हावं असं प्रत्येकाचं स्वप्न असतं मात्र चक्क हेलिकॉप्टरमधून लग्नाच्या ठिकाणी पोहचणे हे माझ्यासाठी एक स्वप्नच आहे, या गोष्टीचीच काय पण हेलिकॉप्टर मधून प्रवासाची मी कधी कल्पना सुद्धा केली नव्हती. यासाठी मी स्वतःला नशीबवान समजते या शब्दात सिमरन हिने तिच्या भावना व्यक्त केल्या. हा विवाह सोहळा आज पार पडत असला तरी विवाहापूर्वी वधू मुलगी ही लग्नाच्या ठिकाणी हेलिकॉप्टर मधून आल्याने या विवाह सोहळ्याची सोशल मीडियावर चांगलीच चर्चा रंगली आहे.
