शहराच्या प्रमुख प्रवेशद्वारांवरही उभारणार प्रकाशव्यवस्था; राजूमामा भोळेंच्या पाठपुराव्याला यश
जळगाव : प्रतिनिधी
शहरातील नागरी सुविधांचा विस्तार आणि प्रमुख रस्त्यांवरील पायाभूत सुविधांच्या उभारणीसाठी राज्य शासनाने जळगाव महापालिकेला १० कोटी रुपयांचा निधी मंजूर केला आहे. विशेष म्हणजे, या निधीतून शहरातील सर्व १९ प्रभागांमध्ये विकासकामे करण्यासोबतच प्रमुख प्रवेशमार्गांवर प्रकाशव्यवस्था उभारण्याचे नियोजन आहे. त्यामुळे प्रभागनिहाय विकासाला आर्थिक बळ मिळणार असून शहराच्या प्रवेशद्वारांचेही स्वरूप बदलण्याची अपेक्षा आहे.
नगरविकास विभागाने सन २०२६-२७ या आर्थिक वर्षासाठी ‘महापालिका क्षेत्रात मूलभूत सोयी-सुविधांच्या विकासासाठी विशेष तरतूद’ या योजनेंतर्गत हा निधी मंजूर केला आहे. गुरुवारी (ता. ५) याबाबतचा शासन निर्णय जारी करण्यात आला. आमदार सुरेश भोळे (राजूमामा) यांनी शहरातील विकासकामांसाठी मुख्यमंत्री देवेंद्र फडणवीस यांच्याकडे केलेल्या सातत्यपूर्ण पाठपुराव्यामुळे निधी मंजुरीचा मार्ग मोकळा झाला.
प्रवेशमार्गांवर उजळणार दिवे
या निधीतील महत्त्वाचा भाग शहराच्या प्रमुख प्रवेशमार्गांवरील प्रकाशव्यवस्थेसाठी वापरण्यात येणार आहे. रात्रीच्या वेळी शहरात येणाऱ्या वाहनधारकांना पुरेसा प्रकाश मिळावा, तसेच वाहतुकीची सुरक्षितता वाढावी, या दृष्टीने ही व्यवस्था महत्त्वाची ठरणार आहे. याशिवाय सर्व १९ प्रभागांमध्ये स्थानिक गरजांनुसार रस्ते आणि इतर मूलभूत सुविधांची कामे हाती घेण्यात येणार आहेत.
कामांच्या अंमलबजावणीचे आव्हान
१० कोटींचा निधी मंजूर झाल्याने विकासकामांसाठी तरतूद उपलब्ध झाली असली, तरी आता कामांची निवड, प्रशासकीय प्रक्रिया आणि प्रत्यक्ष अंमलबजावणी महत्त्वाची ठरणार आहे. निधीचा समतोल वापर करून सर्व प्रभागांना न्याय देण्याची जबाबदारी महापालिका प्रशासनावर असेल.
दरम्यान, निधी मंजुरीबद्दल आमदार भोळे यांनी मुख्यमंत्री देवेंद्र फडणवीस, उपमुख्यमंत्री, मंत्री गिरीश महाजन आणि पालकमंत्री गुलाबराव पाटील यांचे आभार मानले आहेत.
