पालकमंत्री गुलाबराव पाटलांचे पाणी जपण्याचे भावनिक आवाहन!
जळगाव | प्रतिनिधी जिल्ह्यातील शेतकरी आणि नागरिकांसाठी दिलासादायक बातमी आहे. संभाव्य पाणीटंचाई लक्षात घेता गिरणा आणि वाघूर नदीतून पाण्याचे आवर्तन सोडण्याचा निर्णय कालवा समितीच्या बैठकीत घेण्यात आला आहे. त्यानुसार वाघूर नदीला ५ डिसेंबरला, गिरणा नदीला १५ डिसेंबरला, तर अंजनी नदीलाही पाण्याचे आवर्तन सोडण्यात येणार आहे. या निर्णयामुळे सिंचनासाठी पाण्याची प्रतीक्षा करणाऱ्या शेतकऱ्यांना मोठा दिलासा मिळणार आहे.
कालवा समितीच्या बैठकीला पालकमंत्री गुलाबराव पाटील, जलसंपदामंत्री गिरीश महाजन, मंत्री संजय सावकारे, आमदार अमोल पाटील, आमदार नंदू महाजन यांच्यासह संबंधित अधिकारी उपस्थित होते. बैठकीत जिल्ह्यातील उपलब्ध जलसाठा, आगामी काळातील पाण्याची गरज आणि शेतीसह पिण्याच्या पाण्याच्या नियोजनावर सविस्तर चर्चा करण्यात आली.
शेतकऱ्यांच्या शेतीला मिळणार पाणी!
गिरणा आणि वाघूर नदीला आवर्तन सोडण्याच्या निर्णयामुळे नदीकाठच्या गावांमधील पिण्याच्या पाण्याचा प्रश्न काही प्रमाणात मार्गी लागण्यास मदत होणार आहे. तसेच रब्बी हंगामातील पिकांसाठी सिंचनाचे पाणी उपलब्ध होणार असल्याने शेतकऱ्यांना दिलासा मिळण्याची अपेक्षा आहे. पाण्याअभावी शेतीचे नियोजन करताना अडचणींचा सामना करणाऱ्या बळीराजासाठी हा निर्णय महत्त्वाचा ठरणार आहे.
पालकमंत्र्यांचे भावनिक आवाहन; पाण्याचा प्रत्येक थेंब जपा!
दरम्यान, पालकमंत्री गुलाबराव पाटील यांनी शेतकरी आणि नागरिकांना पाणी जपून वापरण्याचे कळकळीचे आवाहन केले आहे. आवर्तन सोडले म्हणजे पाणी मुबलक प्रमाणात उपलब्ध झाले, असा समज करून घेऊ नये. उपलब्ध पाण्याचा वापर अत्यंत काटकसरीने करणे गरजेचे आहे. शेतकऱ्यांनी शेतीसाठी आवश्यक तेवढेच पाणी वापरावे, तर नागरिकांनीही पिण्याच्या पाण्याचा अपव्यय टाळावा.
आज उपलब्ध असलेला पाण्याचा प्रत्येक थेंब उद्याच्या गरजेसाठी महत्त्वाचा आहे. त्यामुळे पाणी मिळाले म्हणून त्याचा अपव्यय करू नका, गरजेपुरतेच पाणी वापरा आणि पाण्याचे योग्य नियोजन करा, असा संदेश पालकमंत्र्यांनी दिला.
एकीकडे शेतकऱ्यांना सिंचनासाठी पाणी मिळण्याचा मार्ग मोकळा होत असताना दुसरीकडे भविष्यातील पाणीटंचाई टाळण्यासाठी पाण्याची बचत करण्याचे आव्हानही कायम आहे. त्यामुळे प्रशासनासोबतच शेतकरी आणि नागरिकांनीही पाणी बचतीची जबाबदारी स्वीकारणे आवश्यक आहे.
