विजय पाटील :जळगाव प्रतिनिधी : गिरणा मोठा प्रकल्पात पाण्याची आवक सातत्याने वाढत असल्याने आज, 31 जुलै 2026 रोजी दुपारी 1 वाजता गिरणा धरणाचे दरवाजे उघडून 1,000 ते 2,000 क्युसेक्स पाण्याचा विसर्ग गिरणा नदीपात्रात करण्यात येणार असल्याची माहिती पाटबंधारे उपविभाग, चाळीसगाव यांनी दिली आहे.
आज दुपारी 12 वाजेपर्यंत धरणात 97.06 टक्के पाणीसाठा झाला असून, सध्या धरणात 10,000 ते 15,000 क्युसेक्स पाण्याची आवक सुरू आहे. पाण्याची आवक आणखी वाढल्यास विसर्गातही वाढ करण्यात येणार असल्याचे प्रशासनाने स्पष्ट केले आहे.
यामुळे गिरणा नदीकाठावरील नागरिकांनी सतर्क राहावे, असे आवाहन करण्यात आले आहे. नदीकाठावरील पशुधन, शेतीतील मोटार पंप, साहित्य व इतर मौल्यवान वस्तू सुरक्षित ठिकाणी हलविण्याच्या सूचना देण्यात आल्या आहेत. तसेच नदीपात्रात सुरू असलेल्या विविध विभागांच्या बांधकामांवरील साहित्य आणि यंत्रसामग्रीही तातडीने सुरक्षित स्थळी हलविण्याचे निर्देश देण्यात आले आहेत.
कोणतीही अप्रिय घटना टाळण्यासाठी नागरिकांनी नदीपात्रात जाणे टाळावे व प्रशासनाच्या सूचनांचे पालन करावे, असे आवाहन पाटबंधारे विभागाने केले आहे.
