धरणगाव (जि. जळगाव) – तालुक्यातील श्री क्षेत्र तळे येथे सोमवार, दिनांक १० एप्रिल २०२४ रोजी भव्य पुरस्कार वितरण व महंत दीक्षा प्रदान सोहळा मोठ्या उत्साहात पार पडणार आहे. या धार्मिक व आध्यात्मिक कार्यक्रमाचे आयोजन श्री विठ्ठल रुक्मिणी मंदिर व श्री संत तानसेन महाराज संस्थान यांच्या वतीने करण्यात आले आहे.
या सोहळ्यात महंतश्री १००८ अनंतदासजी महाराज यांच्या मार्गदर्शनाखाली विविध मान्यवरांच्या उपस्थितीत महंत दीक्षा प्रदान करण्यात येणार आहे. तसेच समाजातील विविध क्षेत्रात उल्लेखनीय कार्य करणाऱ्या व्यक्तींचा सन्मान करून त्यांना पुरस्कारही प्रदान केले जाणार आहेत.
कार्यक्रमाची सुरुवात सकाळी ९ वाजता मिरवणूक व संत स्वागताने होणार असून, त्यानंतर हरिकिर्तनाचा कार्यक्रम रंगणार आहे. पुढे मुख्य सोहळ्यात पुरस्कार वितरण व महंत दीक्षा प्रदान विधी पार पडणार आहे.
या कार्यक्रमाचे प्रमुख आकर्षण म्हणजे संत सेवक ह.भ.प. बाबूलाल सिताराम पाटील यांचा सत्कार व त्यांचे मार्गदर्शन. त्यांच्या कार्याचा गौरव करत त्यांना विशेष मान देण्यात येणार आहे.
तसेच, उपस्थित भाविकांसाठी दुपारी १२ ते ३ या वेळेत महाप्रसादाचे आयोजन करण्यात आले आहे. या सोहळ्यासाठी परिसरातील भाविक व नागरिक मोठ्या संख्येने उपस्थित राहणार असल्याची अपेक्षा व्यक्त केली जात आहे.
कार्यक्रमाचे आयोजन श्री संत तानसेन महाराज भजनी मंडळ, ग्रामस्थ मंडळ व तरुण मित्र मंडळ, श्री क्षेत्र तळे बु. (ता. धरणगाव, जि. जळगाव) यांच्या संयुक्त विद्यमाने करण्यात आले असून, आयोजकांनी सर्व भाविकांनी उपस्थित राहून सोहळ्याचा लाभ घ्यावा, असे आवाहन केले आहे.
