भुसावळ : प्रतिनिधी
होळीच्या दिवशी मोटरसायकलची समोरासमोर जोरदार धडक झाल्याने विरोदा येथील ४८ वर्षीय तरुणाचा मृत्यू झाल्याची घटना फैजपूर -भुसावळ मार्गावरील बामणोद गावाजवळील हॉटेलसमोर घडली. याप्रकरणी फैजपूर पोलिस ठाण्यात अपघाताची नोंद केली आहे. अपघाताला कारणीभूत ठरलेल्या अज्ञात मोटरसायकलस्वाराचा पोलिस शोध घेत आहेत.
विरोदा येथील रहिवासी तथा श्रीराम ट्रेडिंगचे संचालक युवराज भगवान कपले (वय ४८) हे २ मार्च होळीच्या दिवशी बामणोद येथे कर्णछेदन कार्यक्रमासाठी गेले होते. रात्री सुमारे १०:३० वाजता ते मोटरसायकलने विरोदा येथे परतत असताना आमोदेच्या दिशेने भरधाव येणाऱ्या दुसऱ्या मोटरसायकलने त्यांच्या दुचाकीला समोरासमोर जोरदार धडक दिली. अपघातात कपले गंभीर जखमी झाले.
दरम्यान, अपघातानंतर आरोपी मोटरसायकलस्वाराने आपली ओळख पटू नये म्हणून वाहनाची नंबर प्लेट काढण्याचा प्रयत्न केल्याचे नागरिकांनी सांगितले. नागरिकांनी त्याला पकडण्याचा प्रयत्न केला असता तो घटनास्थळावरून पळून गेला. गंभीर जखमी अवस्थेत असलेल्या युवराज कपले यांना तातडीने भुसावळ येथील ट्रामा केअर सेंटरमध्ये उपचारासाठी दाखल करण्यात आले. मात्र, डॉक्टरांनी तपासणी करून त्यांना मृत घोषित केले. दरम्यान, अपघातग्रस्त दोन्ही मोटरसायकली पोलिसांनी ताब्यात घेतल्या आहेत.
