सासू, साली व साडूविरुद्ध गुन्हा दाखल; पैशांच्या तगाद्यामुळे टोकाचा निर्णय घेतल्याचा उल्लेख
एरंडोल : प्रतिनिधी
एरंडोल तालुक्यातील भातखेडा येथील एका तरुणाने सासरच्या मंडळींकडून होणाऱ्या मानसिक त्रासाला कंटाळून आत्महत्या केल्याची धक्कादायक घटना उघडकीस आली आहे. गौरव ज्ञानेश्वर बडगुजर असे आत्महत्या केलेल्या तरुणाचे नाव असून त्यांनी मृत्यूपूर्वी लिहिलेल्या चिठ्ठीत सासरच्या लोकांकडून होत असलेल्या त्रासाचा उल्लेख केल्याने परिसरात मोठी खळबळ उडाली आहे.
मिळालेल्या माहितीनुसार, गौरव बडगुजर हे काही दिवसांपासून मानसिक तणावाखाली होते. सासरच्या मंडळींकडून वारंवार पैशांची मागणी केली जात होती तसेच धमक्याही दिल्या जात असल्याचे त्यांनी आपल्या सुसाइड नोटमध्ये नमूद केले आहे. या मानसिक छळामुळेच टोकाचा निर्णय घेत असल्याचे त्यांनी चिठ्ठीत लिहिले असल्याची माहिती पोलिसांनी दिली. या प्रकरणी कासोदा पोलिस ठाण्यात गुन्हा दाखल करण्यात आला आहे. मयत गौरव बडगुजर यांच्या सासू अनिता बडगुजर, साडू भटू गरुड आणि साली गौरी गरुड यांच्याविरुद्ध आत्महत्येस प्रवृत्त केल्याप्रकरणी गुन्हा नोंदवण्यात आला आहे.
घटनेची माहिती मिळताच पोलिसांनी घटनास्थळी धाव घेत पंचनामा केला. पोलिसांनी घटनास्थळावरून सुसाइड नोट जप्त केली असून या प्रकरणी पुढील तपास सुरू केला आहे. या घटनेमुळे परिसरात हळहळ व्यक्त केली जात आहे.
