जळगाव : प्रतिनिधी
रावेरला सोडतो असे सांगून कारमध्ये बसवून घेत सलमान खान अमानउल्ला खान (५२, रा. निंभोरा, ता. रावेर) यांना चाकूचा धाक दाखवून चार जणांनी खिशातून ९ हजार ७०० रुपये काढून घेतले. ही घटना २८ फेब्रुवारी रोजी अजिंठा चौफुली ते प्रीतम पार्क दरम्यान घडली. याप्रकरणी १ मार्च रोजी एमआयडीसी पोलिस ठाण्यात गुन्हा दाखल करण्यात आला आहे. यातील कारचालक शंभू सुभाष पाटील (३२, रा. पिंप्राळा) याला अटक करून कार जप्त केली.
स्थानिक गुन्हे शाखेचे पोलिस निरीक्षक राहुल गायकवाड यांच्या मार्गदर्शनाखाली उपनिरीक्षक शरद बागल, सहायक फौजदार अतुल वंजारी, पोहेकॉ विजय पाटील, अक्रम शेख नितीन बाविस्कर, किशोर पाटील, रवींद्र कापडणे, राहुल रगडे, छगन तायडे, प्रदीप चवरे यांनी तांत्रिक माहिती संकलित केली.
त्यानुसार कारचालक शंभू पाटील याला अटक केली व गुन्ह्यात वापरलेली कार पोलिसांनी जप्त केली.
रावेर तालुक्यातील निंभोरा येथील सलमान खान हे २८ फेब्रुवारी रोजी सायंकाळी सव्वा पाच वाजेच्या सुमारास रावेर येथे जाण्यासाठी अजिंठा चौफुली परिसरात उभे होते. त्यावेळी एका कारचालकाने १०० रुपये द्या, तुम्हाला रावेरला सोडतो असे सांगून खान यांना कारमध्ये बसवून घेतले.
काही अंतरावर गेल्यानंतर कारमध्ये मागच्या सीटवर बसलेल्यांनी सलमान खान यांचे हात पकडून ठेवले तर एकाने चाकूचा धाक दाखवून त्यांच्या खिशातून ९ हजार ७०० रुपये जबरदस्तीने काढून घेत खाली उतरवून दिले.
