जळगाव : प्रतिनिधी
घराशेजारी कार्यक्रमासाठी उभारण्यात आलेल्या मंडपाच्या दोरीला गळफास घेत रियाज जोहबा तडवी (वय १९, मूळ रा. लोहारा, ता. रावेर, ह. मु. सुप्रिम कॉलनी) या तरुणाने आत्महत्या केल्याची घटना शनिवारी पहाटे पाच वाजेच्या सुमारास उघडकीस आली. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, रावेर तालुक्यातील लोहारा येथील रियाज तडवी हा तरुण कुटुंबासह सध्या सुप्रिम कॉलनीत वास्तव्यास होता. तो मजुरीचे काम करून कुटुंबाला हातभार लावत होता. त्यांच्या घराशेजारी कार्यक्रम असल्यामुळे मंडप उभारण्यात आला होता. मध्यरात्रीच्या सुमारास रियाज याने मंडपाच्या दोरीच्या सहाय्याने गळफास घेत आपली जीवनयात्रा संपविली.
शनिवारी पहाटे ही बाब लक्षात आल्यानंतर त्याला तात्काळ जिल्हा शासकीय वैद्यकीय महाविद्यालय व रुग्णालयात दाखल करण्यात आले. मात्र, डॉक्टरांनी तपासणीअंती त्याला मयत घोषित केले. रियाज तडवी याच्या आत्महत्येचे नेमके कारण अद्याप अस्पष्ट असून एमआयडीसी पोलीस पुढील तपास करीत आहेत.
