जळगाव : प्रतिनिधी
शहरापासून नजीक असलेले आव्हाणे येथे गुरुवारी रात्री झालेल्या वादातून सागर अरुण बिन्हाडे या तरुणाचा मृत्यू झाल्याची घटना, २२ जानेवारी रोजी रात्री घडली होती. याप्रकरणी जळगाव तालुका पोलिसांनी मुख्य संशयित आरोपी सुमीत उर्फ टक्या उमेश सपकाळे (वय २०) याला शुक्रवारी ताब्यात घेतले आहे. दरम्यान, या घटनेत इतरही काहींचा सहभाग असल्याचा दावा करत मयताच्या नातेवाईकांनी पोलीस अधीक्षकांची भेट घेतली.
२२ जानेवारी रोजी रात्री ९ वाजेच्या सुमारास आव्हाणे गावात किरकोळ कारणावरून हाणामारी झाली होती. यावेळी संशयित आरोपी सुमीत उर्फ टक्या सपकाळे याने सागर बिन्हाडे यांना बेदम मारहाण केली. या मारहाणीत गंभीर दुखापत झाल्याने सागर यांचा मृत्यू झाला. या धक्कादायक घटनेनंतर मयताची पत्नी रेखा बिन्हाडे यांच्या फिर्यादीवरून जळगाव तालुका पोलीसात खुनाचा गुन्हा दाखल केला. शुक्रवारी पोलिसांनी मुख्य संशयित आरोपीला अटक केली असली, तरी या हत्येमागे इतरही संशयितांचा हात असल्याचा आरोप नातेवाईकांनी केला आहे.
