रावेर : प्रतिनिधी
तालुक्यातील केऱ्हाळे बु. येथे पत्र्याच्या शेडवर काम करत असताना खाली पडून एका कामगाराचा दुर्दैवी मृत्यू झाल्याची घटना गुरुवारी सकाळी घडली. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, केऱ्हाळे बु. येथील एकता नगर परिसरात शिवम बाजीराव पाटील यांच्या घराच्या पत्र्याच्या शेडवर काम सुरू असताना विजय दत्तात्रय पाटील (वय ४५, रा. केऱ्हाळे बु., ता. रावेर) हे अचानक शेडवरून खाली कोसळले. या अपघातात ते गंभीर जखमी झाले. त्यांना तातडीने रावेर ग्रामीण रुग्णालयात दाखल करण्यात आले; मात्र वैद्यकीय अधिकारी डॉ. प्रद्युम्न महाजन यांनी त्यांना दाखलपूर्व मृत घोषित केले.
ही घटना गुरुवार, दि. १९ डिसेंबर रोजी सकाळी सुमारे १० वाजण्याच्या सुमारास घडली. याप्रकरणी रवींद्र भिका पाटील यांनी दिलेल्या खबरीवरून रावेर पोलिस ठाण्यात अकस्मात मृत्यूची नोंद करण्यात आली आहे. रावेर ग्रामीण रुग्णालयात मृतदेहाचे शवविच्छेदन करण्यात आले असून, पुढील तपास हे.कॉ. योगेश महाजन करीत आहेत.
