चाळीसगाव : प्रतिनिधी
चाळीसगाव शहरात पुन्हा एकदा गुन्हेगारीने डोके वर काढले असून, शुक्रवारी (दि. १९) मध्यरात्री २ ते ३ वाजेच्या सुमारास रेल्वे स्टेशन परिसरात झालेल्या गोळीबाराच्या घटनेमुळे संपूर्ण जिल्हा हादरला आहे. जुन्या वादातून हा थरारक प्रकार घडल्याची प्राथमिक माहिती असून, एका तरुणावर सलग दोन राऊंड फायर करण्यात आल्याने परिसरात भीतीचे वातावरण पसरले आहे.
या घटनेत रोहिदास कोळी हा तरुण गंभीर जखमी झाला आहे. मध्यरात्री स्टेशन परिसरात शुकशुकाट असताना अज्ञात हल्लेखोरांनी रोहिदासला गाठून कोणतीही पूर्वसूचना न देता त्याच्यावर दोन वेळा गोळीबार केला. गोळीबाराचा आवाज होताच परिसरात एकच खळबळ उडाली. जखमी अवस्थेत रोहिदासला तात्काळ चाळीसगाव ग्रामीण रुग्णालयात दाखल करण्यात आले असून, सध्या त्याच्यावर उपचार सुरू आहेत. डॉक्टरांनी त्याची प्रकृती गंभीर असल्याचे सांगितले आहे.
घटनेची माहिती मिळताच चाळीसगाव पोलिसांनी तातडीने घटनास्थळी धाव घेत परिसराची नाकेबंदी केली. हा हल्ला पूर्ववैमनस्यातून झाल्याची शक्यता पोलिसांकडून व्यक्त करण्यात येत असून, तपास अधिक गतीने करण्यासाठी नाशिक किंवा धुळे येथून फॉरेन्सिक पथकाला पाचारण करण्यात आले आहे. तसेच परिसरातील सीसीटीव्ही कॅमेऱ्यांची तपासणी सुरू आहे. या प्रकरणी पोलीस ठाण्यात गुन्हा दाखल करण्याची प्रक्रिया सुरू असून, हल्लेखोरांचा शोध घेण्यासाठी विशेष पथके कार्यरत करण्यात आली आहेत. शहरातील वाढत्या गुन्हेगारी घटनांमुळे नागरिकांमध्ये तीव्र चिंता व्यक्त केली जात आहे.
