जळगाव : प्रतिनिधी
बँकेत पैसे भरण्यासाठी आलेल्या नागरिकाची हातचालाखीने फसवणूक केल्याची घटना जळगाव शहरातील स्टेट बँक ऑफ इंडियाच्या मुख्य शाखेत घडली आहे. पैसे मोजून देण्याच्या बहाण्याने दोन अनोळखी तरुणांनी १३ हजार रुपये लांबविल्याचा प्रकार २८ नोव्हेंबर रोजी घडला असून, याप्रकरणी १३ डिसेंबर रोजी जिल्हापेठ पोलिस ठाण्यात गुन्हा दाखल करण्यात आला आहे.
मयूर कॉलनीतील रहिवासी सतीश दशरथ चौधरी (वय ५७) हे त्यांच्या मित्राच्या मुलीला ५० हजार रुपये पाठविण्यासाठी स्टेट बँकेच्या मुख्य शाखेत गेले होते. बँकेत स्लिप भरत असताना शेजारी बसलेल्या दोन अनोळखी तरुणांनी त्यांना मदत करण्याचा बहाणा केला. त्यानंतर चौधरी यांनी खिशातून ५० हजार रुपयांची रोकड काढली असता, दोघांनी ‘आम्ही पैसे मोजून देतो’ असे सांगत ती रक्कम त्यांच्या हातातून घेतली.
या दोघांनी अर्धे-अर्धे पैसे वाटून घेत मोजल्याचा बनाव केला व चौधरी यांना परत देत ५० हजार रुपये असल्याचे सांगितले. मात्र, चौधरी यांनी कॅशिअरकडे पैसे जमा करताना त्यात १३ हजार रुपये कमी असल्याचे निदर्शनास आले. तत्काळ त्यांनी दोघा तरुणांचा शोध घेतला असता ते बँकेतून पसार झाल्याचे आढळले. या प्रकरणी सतीश चौधरी यांनी जिल्हापेठ पोलिस ठाण्यात फिर्याद दिली असून, पोलिसांनी दोन अज्ञातांविरुद्ध गुन्हा दाखल करून पुढील तपास सुरू केला आहे.
