जळगाव : प्रतिनिधी
जळगाव शहरातील एमआयडीसी परिसरातील अयोध्या नगर भागात महिलेच्या गळ्यातील सोनसाखळी जबरीने हिसकावून पळणाऱ्या दुचाकीस्वारांच्या टोळीचा पर्दाफाश एमआयडीसी पोलिसांनी अवघ्या काही दिवसांत केला आहे. गुप्त माहितीच्या आधारे रचलेल्या सापळ्यातून दोन्ही आरोपी जेरबंद करण्यात आले असून चोरीस गेलेल्या सोन्याचा मुद्देमालही पोलिसांनी हस्तगत केला आहे.
दि. 16 नोव्हेंबर 2025 रोजी अयोध्या नगरतील एक महिला दुचाकीने घरी पोहोचत असताना मागून आलेल्या दोन अज्ञात दुचाकीस्वारांनी तिच्या गळ्यातील सोनसाखळी जबरदस्तीने खेचून पोबारा केला. या घटनेमुळे परिसरात भीतीचे वातावरण पसरले होते. याबाबत एमआयडीसी पोलीस स्टेशनमध्ये गुन्हा क्रमांक 849/2025 भा.दं.वि. 2023 चे कलम 309(4), 3(5) प्रमाणे गुन्हा दाखल करण्यात आला होता.
त्यानंतर गुप्त बातमीदारांच्या मदतीने पोलिसांनी माहिती गोळा करून आरोपींची ओळख पटवली. 18 नोव्हेंबर रोजी माऊली नगर भागात सापळा रचून पोलिसांनी एक संशयिताला ताब्यात घेतले. चौकशीदरम्यान त्याने आपले नाव तेजस अनिल ईखनकर (रा. ज्ञानदेव नगर, जळगाव) असे सांगितले आणि गुन्ह्याची कबुलीही दिली. त्याने चोरीत आपला साथीदार प्रसाद उर्फ परेश संजय महाजन (रा. ज्ञानदेव नगर, जळगाव) सहभागी असल्याचेही सांगितले. विशेष म्हणजे, प्रसाद उर्फ परेश हा शनिपेठ पोलिस स्टेशन हद्दीत झालेल्या खुनाच्या गुन्ह्यापासून फरार होता.
यादरम्यान पोलिसांनी 19 नोव्हेंबर रोजी माऊली नगर भागातून प्रसाद उर्फ परेश संजय महाजन यालाही ताब्यात घेतले. दोघांकडून चोरी केलेल्या मालामधून ८ ग्रॅम वजनाची, किंमत अंदाजे ८० हजार रुपये असलेली सोन्याची लगड पोलिसांनी हस्तगत केली आहे. या कारवाईमुळे परिसरातील नागरिकांनी सुटकेचा निश्वास टाकला आहे.
ही संपूर्ण कारवाई एमआयडीसी पोलिस स्टेशनचे पोलीस निरीक्षक बबन आव्हाड यांच्या मार्गदर्शनाखाली करण्यात आली. तपास पथकात पोउनि राहुल ताडे, पोउनि चंद्रकांत के., सफौ विजयसिंग पाटील, पोह प्रदीप चौधरी, पोह गिरीश पाटील, पोह प्रमोद लावंजारी, पोह किरण पाटील ठाकूर, पोकॉ किरण पाटील, पोकॉ शशिकांत मराठी, पोकॉ चेतन पाटील यांचा समावेश होता. संपूर्ण कारवाईवर डॉ. महेश्वर रेड्डी (पोलीस अधीक्षक, जळगाव), मा. अशोक नखाते (अपर पोलीस अधीक्षक, जळगाव), मा. नितीन गणापुरे (उपविभागीय पोलीस अधिकारी, जळगाव) यांचे मार्गदर्शन लाभले.
