जळगाव : प्रतिनिधी
शहरापासून जवळ असलेल्या एमआयडीसी परिसरातील अवैध दारुच्या अड्ड्यावर गोळीबार केल्यानंतर संशयित हल्लेखोर हे पसार झाले होते. हल्लेखोर संशयित हे दुचाकीवरुन नांदूरा येथे पळून जात असल्याची माहिती पोलिसांना मिळाली. त्यानुसार मागावर असलेल्या एमआयडीसी पोलीस ठाण्यातील गुन्हे शोध पथकाने राहुल रामचंद्र बऱ्हाटे (वय ३५), मोनाली राहुल बऱ्हाटे (वय ३०, दोघ रा. रामेश्वर कॉलनी) नांदूर गावाजवळून त्यांच्या मुसक्या आवळल्या.
सविस्तर वृत्त असे कि, उत्तरप्रदेशातील रहिवासी असलेले फिरोज शेख, राजन शेख व इतर गावातील काही मजूर हे एमआयडीसीतील जी १४ सेक्टरमधील विजेते कंपनीत काम करतात. त्यांच्या कंपनीपासून काही अंतरावर राहुल बऱ्हाटे याची पानपटरी असून तो तेथे अवैधरित्या दारु विक्री करीत होता. रविवारी रात्री १० वाजता सरफू अहमद हा पुडी घेण्याकरीता त्याच्याकडे गेला असता, त्याला राहुलने मारहाण केली. कंपनीतील कामगार हे त्याला समजविण्यासाठी गेले असता, राहुलची पत्नी मोनाली स्कुटरवर तेथे आली. तिने राहुलच्या हातात दिलेल्या गावठी पिस्तुलमधून राहुलने कामगारांवर गोळीबार केला. या गोळीबारात राजन शेख रफिउल्ला व अहमद फिरोज शेख हे दोघ गंभीर जखमी झाले. त्यानंतर दोघ दाम्पत्य घटनास्थळहून पसार झाले.
गावठी पिस्तुलातून झाडलेली गोळी राजन शेख याच्या किडनीजवळ लागल्यामुळे त्याची प्रकृती चिंताजनक होती. तर गंभीर जखमी अहमद फिरोज शेख याच्यावर उपचार सुरु आहे. राजन शेख याच्यावर जिल्हा रुग्णालयात उपचार सुरु असतांना सोमवारी दुपारच्या सुमारास त्याचा मृत्यू झाला. त्यामुळे या गुन्ह्यात खुनाचे कलम देखील वाढविण्यात आले आहे. गोळीबार करणारा राहुल ब-हाटे याच्याविरुद्ध आठ ते दहा गंभीर गुन्ह्यांची नोंद असून त्याच्यावर एमपीडीएतंर्गत कारवाई करण्यात आली होती. दरम्यान, आता त्याने अवैध दारुच्या अड्ड्यावर गोळीबार केल्यानंतर तो पत्नीसह पसार झाला होता. तेव्हापासून एमआयडीसी पोलीस ठाण्यातील गुन्हे शोध पथकातील कर्मचारी त्यांच्या मागावर होते.
मागावर असलेल्या पथकाला संशयित हल्लेखोर राहुल बऱ्हाटे हा पत्नीसह दुचाकीवरुन नांदूराच्या दिशेने जात असल्याची माहिती मिळाली. पथकाने सापळा रचून संशयिताचा पाठलाग सुरु केला. संशयित हे नांदूरा चौफुलीजवळ पोहचताच त्या दोघांना जेरबंद केले. त्यांना मंगळवारी न्यायालयात हजर केले असता, त्यांना दि. १० रोजी पर्यंत ७ दिवसांची पोलीस कोठडी सुनावली.
ही कारवाई एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली गुन्हे शोध पथकातील उपनिरीक्षक राहुल तायडे, चंद्रकांत धनके, सफौ विजयसिंग पाटील, प्रदीप चौधरी, किरण चौधरी, गणेश ठाकरे, नितीन ठाकूर, शशिकांत मराठे, किरण पाटील, गिरीष पाटील यांच्या पथकाने केली.
