जामनेर : प्रतिनिधी
तालुक्यातील देऊळगाव येथे फत्तेपूर पोलिसांचे वाहन गस्तीवर असताना बुधवारी मध्यरात्री १च्या सुमारास त्यांना देऊळगाव गुजरी (ता. जामनेर) येथे विनाक्रमांकाचे वाहन आढळून आले. चालकाशेजारील दोघांना उतरवून चौकशी करीत असताना चालकाने वाहन धामणगाव बढेकडे पळवून नेल्याचा प्रकार घडला.
मिळालेल्या माहितीनुसार, पोलिस हवालदार मुकेश शालीग्राम पाटील यांनी दिलेल्या फिर्यादीनुसार, रात्री ११च्या सुमारास पोलिस ठाणे हद्दीत रात्रीची गस्त घालत असताना मध्यरात्री १च्या सुमारास देऊळगाव गुजरी येथे संशयित वाहन आढळून आले. चालकाशेजारी बसलेले शेख मुजम्मिल शेख रफिक कुरेशी (२७, माळीखेल, कुरेशी वाडा, बुलढाणा) व रहीम शाहा रहेमान शाहा (४४, बऱ्हाणपूर रोड, जळगाव, मूळ रा. पिंपळगाव काळे, ता. जळगाव जामोद) यांना खाली उतरवून चौकशी करीत असताना चालकाने वाहनासह पळ काढला. दोघांनी उडवाउडवीची उत्तरे दिल्याने तसेच ते रात्री चोरी करण्याच्या उद्देशाने वाहनातून फिरताना आढळून आल्याने त्यांच्याविरुद्ध गुन्हा नोंदविण्यात आला आहे.
