नवी दिल्ली : वृत्तसंस्था
गेल्या काही वर्षापासून व्यावसायिक व घरगुती सिलिंडरच्या भावात मोठी वाढ होत असतांना आता केंद्र सरकार पुन्हा एकदा घरगुती सिलिंडरच्या किमती कमी करणार आहे. पुढच्या वर्षी मार्च-एप्रिलमध्ये भारतात लोकसभा निवडणुका होण्याची शक्यता आहे. यासाठी केंद्र सरकारने LPG ग्राहकांना मोठा दिलासा देऊ शकते अशी शक्यता वर्तवण्यात आली आहे.
मिंटमध्ये प्रसिद्ध प्रकाशित झालेल्या बातमीनुसार सरकार गॅस सिलिंडरवरील सबसिडी वाढवण्याचा विचार करत आहे. सरकारने पंतप्रधान उज्जवला योजनेच्या लाभार्थ्यांना गॅस सिलिंडरच्या अनुदानात वाढ जाहीर करणे अपेक्षित आहे. या योजनेच्या रकमेत वाढ झाल्याने करोडो गॅस ग्राहकांना दिलासा मिळणार आहे.
उज्जवल योजनेचा लाभ जास्तीत जास्त कुटुंबांपर्यंत पोहोचण्यासाठी ग्राहक संख्या वाढवण्यावरही सरकार भर देत आहे. वाढत्या महागाईला आळा बसवण्यासाठी सरकारने महत्त्वाचे पाऊल उचलणे गरजेचे आहे. सप्टेंबर महिन्यात महागाईचा दर ५.०२ टक्क्यांवर घसरला आहे. सरकारने आरबीआयला महागाई दर ४ ते ६ टक्क्यां दरम्यान ठेवण्याचे लक्ष्य दिले आहे. यापूर्वी जुलैमध्ये महागाईचा दर १५ महिन्यांच्या विक्रमी पातळीवर पोहोचला होता.
