जळगाव : प्रतिनिधी
भुसावळ तालुक्यातील सुनसगाव येथील शिक्षकाचा बैलगाडीवरुन पडल्याने मृत्यू झाला. ही दुर्घटना रविवारी घडली.
तालुक्यातील सुनसगाव येथील दादासाहेब दामू पांडू पाटील माध्यमिक विद्यालयातील कला शिक्षक संदीप नरोत्तम महाजन (४५, रा. साथी बाजार, नशिराबाद, ता. जळगाव) हे रविवार, २४ सप्टेंबर रोजी सकाळी साडेसात वाजेच्या दरम्यान शेतातील कामासाठी बैलगाडी घेऊन जात होते. त्यावेळी अचानक बैल उधळल्याने संदीप महाजन हे बैलगाडीवरून पडले असता, त्यांच्या डोक्याला मार लागला आणि नाकातून मोठ्या प्रमाणात रक्तस्त्राव झाला. त्यांना जळगाव येथे सामान्य रुग्णालयात दाखल केले असता, डॉक्टरांनी मयत घोषित केले.
सुनसगाव येथे बीएलओ म्हणून संदीप महाजन हे काम पाहत होते. ते एक उत्कृष्ट चित्रकार होते. ते विद्यार्थीप्रिय शिक्षक होते. त्यांच्या वडिलांचे चार महिन्यांपूर्वीच अल्पशः आजाराने निधन झाले. त्यांच्या पश्चात आई, पत्नी, २ मुले असा परिवार आहे.
