मुंबई : वृत्तसंस्था
उत्तर प्रदेश येथून कामानिमित्त कुटुंबासमवेत राहण्यासाठी आलेल्या एका कुटुंबातील पतीने कौटुंबिक वादातून त्याच्या पत्नीचा गळा दाबून खून केल्याची घटना उघडकीस आली आहे. नूरजहाँ मोहम्मद शफिक चौधरी (२८) असे खून झालेल्या महिलेचे नाव आहे. यातील मुख्य बाब म्हणजे बाप जेव्हा आईला मारत होता त्यावेळी त्यांची तीन चिमुकली मुलेदेखील समोर होती. मात्र, बापाचा पारा एवढा चढला होता की, त्याला याचेही भान नव्हते.
याप्रकरणी पोलिसांनी नूरजहाँ यांचा पती मोहम्मद शफिक सुकीरल्ला चौधरी (३४) याला अटक केली असून, याप्रकरणी समर्थ पोलिस ठाण्यात खुनाचा गुन्हा दाखल करण्यात आला आहे. पोलिसांनी दिलेल्या माहितीनुसार, आरोपी मोहम्मद चौधरी हा चार वर्षांपूर्वी कामानिमित्त उत्तर प्रदेश येथून शहरात वास्तव्यास आला होता. भवानी पेठेतील अनंत कोऑपरेटिव्ह सोसायटीतील मंजुळा चाळ या ठिकाणी तो परिवारासह राहत होता. चौधरीचा टेलरिंगचा व्यवसाय होता. नूरजहाँ आणि मोहम्मद यांना अनुक्रमे पाच, अडीच आणि एक वर्षांची तीन मुले आहेत.
लग्न झाल्यापासून या दाम्पत्यामध्ये घरगुती कारणावरून वाद व्हायचे; पण गेल्या काही महिन्यांपासून ते विकोपाला गेले होते. मोहम्मद हा सतत नूरजहाँ हिच्या चारित्र्यावर संशय घेत तिच्याशी भांडण करत होता. याच कारणावरून दोघांमध्ये वाद झाला आणि मोहम्मद चौधरीने गळा दाबून नूरजहाँचा खून केला. याप्रकरणाचा पुढील तपास पोलिस करत आहेत
