मुंबई : वृत्तसंस्था
धाराशिव जिल्ह्यातील कळंब शहरातील मुख्य मार्गावरील स्टेट बँक ऑफ इंडियाचे ३९ लाख रुपये असलेले अख्खे एटीएम मशीनच चोरट्यांनी बुधवारी पहाटे लंपास केले. या घटनेनंतर पोलिसांची शोधपथके चोरट्यांच्या मागावर रवाना झाली असून, सीसीटीव्ही फुटेजचीही तपासात मदत घेतली जात आहे.
कळंब शहरातील ढोकी रोडवरील एका कॉम्प्लेक्समध्ये स्टेट बँक ऑफ इंडियाचे एटीएम मशीन बसविलेले आहे. बुधवारी पहाटे अज्ञात चोरट्यांनी ३९ लाख रुपयांसह एटीएम मशीन लंपास केल्याचे सकाळी समोर आले पोलिसांनी या भागाची पाहणी केली असता एका वाहनात दोरीच्या साहाय्याने ही मशीन उचकटून चोरटे घेऊन गेले असावेत, असा अंदाज त्यांनी व्यक्त केला.
सीसीटीव्हीत संशयास्पद रिक्षा
चोरी झालेल्या परिसरातील एका दुकानाच्या सीसीटीव्हीमध्ये एक तीनचाकी रिक्षा घटना घडल्याच्या वेळेस दिसत असल्याचे समोर आले आहे. त्याचा आणि या घटनेचा काही संबंध आहे का, याचाही तपास पोलिस करीत आहेत
