मुंबई : वृत्तसंस्था
देशातील मणिपूर येथे घडलेल्या घटनेचे आता राज्यात देखील पडसाद उमटू लागले आहेत. माणुसकीला काळिमा फासणारी घटना आता राज्यातील साताऱ्यात फलटणमधील कुरवली खुर्द या गावात ही घटना घडली आहे. या प्रकरणात मायलेकीला संपूर्ण गावासमोर मारहाण करण्यात आली. या मारहाणीत दोघींचे कपडेही फाटले. त्या दोघींना फरफटत नेल्याची माहितीसुद्धा समोर आली आहे. मुलांच्या भांडणातून हा प्रकार घडला आहे.
कुरवली खुर्द या ठिकाणी काल सायंकाळी ही मारहाणीची घटना घडली. यावेळी दोघींना फरफटत नेण्यात आलं यामध्ये त्या दोघींचेही कपडे फाटले. संबंधित महिला विधवा असून तिची मुलगी 16 वर्षांची आहे. घटनेनंतर मायलेकींची तक्रार पोलिसांनी घेतली नसल्याचा आरोपदेखील करण्यात आला आहे. यानंतर फलटण पोलिसांनी सकाळी पीडित महिलेसह मुलीला पोलीस ठाण्यात आणले. पोक्सा आणि अॅट्राॅसीटी अंर्तगत मारहाण करणा-यावर गुन्हा दाखल करण्यात आला. शाळकरी मुलांमध्ये क्रिकेटच्या कारणावरून किरकोळ वाद झाला होता. त्याच वादातून ही मारहाणीची घटना घडली असल्याचे पीडित महिलेने आणि तिच्या मुलीने आपल्या जबाबात म्हंटले आहे. फलटण पोलीस या प्रकरणाचा अधिक तपास करत आहेत.
