धरणगाव : प्रतिनिधी
तालुक्यातील पिंपळेसिम येथे अज्ञात ४० वर्षीय प्रौढाचा मृतदेह विहिरीत आढळला असून हा मृतदेह पाण्यात फुगल्यामुळे अवस्था अत्यंत खराब झाली होती. त्यामुळे ओळख पटविणे शक्य नव्हते.
दि. ३ जानेवारीला सायंकाळी ४.३० वाजण्याच्या सुमारास तालुक्यातील पिंपळेसिम येथील संतोष पाटील आला. यांच्या शेतातील विहिरीत एक मृतदेह तरंगताना आढळला. लागलीच पोलिस पाटील भगवान लक्ष्मण पाटील यांना कळवले. यानंतर घटनास्थळी धरणगाव पोलीस हजर झाले. मृतदेहाची अवस्था बघता हा इसम साधारण एक-दीड दिवसाआधी विहिरीत पडला असल्याची शक्यता वर्तविण्यात आली. त्यानंतर रात्री मृतदेह धरणगाव ग्रामीण रुग्णालयात आणण्यात आला. मृतदेहाचे शवविच्छेदन केल्यानंतर दि. ४ रोजी पालिकेच्या कर्मचाऱ्यांच्या मदतीने मृतदेहाचा दफनविधी करण्यात आला. दरम्यान, धरणाव पोलिसांनी याबाबत सोशल मीडियाच्या माध्यमातून तसेच आजूबाजूच्या गावात स्वतः फिरून विचारपूस करण्यात आली. अगदी दवंडीदेखील देण्यात आली.
