जळगाव : प्रतिनिधी
अजिंठा चौफुलीवर दुचाकीस्वाराला ट्रकने चिरडल्याची घटना शनिवारी रात्री ८ वाजण्याच्या सुमारास घडली. अपघात झाल्यानंतर चौफुलीवर वाहतुकीची मोठी कोंडी झाली होती. नगिन सकरू राठोड (३८) रा. एमआयडीसी) असे मयत दुचाकीस्वाराचे नाव असून, उदय गजाजन राठोड (४०, रा. एमआयडीसी) हा गंभीर जखमी झाला आहे. त्याच्यावर जिल्हा सामान्य रुग्णालयात उपचार सुरू आहेत.
एमआयडीसी भागात राहणारे नगिन राठोड आणि उदय राठोड हे दोघे जण शनिवारी दुचाकीने सुनसगाव येथे बांधकाच्या कामासाठी गेले होते. रात्री ते काम संपवून घराकडे निघाले होते. रात्री ८ वाजण्याच्या सुमारास ते अजिंठा चौफुली येथून जात असताना, त्यांच्या दुचाकीला ट्रकने (क्र. एमएच ४०, बीजी ८९१५) जोरदार धडक दिली. यात नगिन ट्रकच्या चाकाखाली आल्यामुळे जागीच ठार झाला, तर उदय गंभीर जखमी झाला आहे. या अपघातानंतर अजिंठा चौफुलीवर वाहतुकीची मोठी कोंडी झाली होती. नगिन याला वैद्यकीय अधिकाऱ्यांनी तपासणीअंती मृत घोषित केले. उदय याच्यावर उपचार सुरू आहेत. दोघे जण बांधकाम आणि भंगार व्यवसाय करायचे.
