धरणगाव : प्रतिनिधी
कौटुंबिक वादातून एकास मारहाण केल्याप्रकरणी धरणगाव पोलिसांत ८ जणांविरुद्ध गुन्हा दाखल करण्यात आला आहे.
आशिष देवीदास महाले (३६, रा. सातपूर, नाशिक) व पत्नी यांच्यात घटस्फोटाच्या कारणावरून वाद आहे. दि. १८ डिसेंबर रोजी रात्री साडेआठ वाजेच्या सुमारास शहरातील उड्डाणपुलाजवळ आशिष यांना सासरकडील लोकांनी तसेच दोन महिलांनी मारहाण केली.
एवढेच नव्हे तर रस्त्यात अडवून अश्लील शिवीगाळ करून ठार मारण्याची धमकी दिली. त्यातील एकाने त्याच्या पिशवीतून धारदार शस्त्र काढून आशिषच्या मानेवर दुखापत केली. तर अन्य एकाने त्याच्या हातातील लोखंडी रॉडने दोक्यावर मारहाण केली यावेळी त्यांच्या खिशातील ३३ हजार ७०० रुपये व हाताच्या बोटात असलेली सोन्याची अंगठी व मोबाइल काढून घेण्यात आल्याचे आशिष महाले यांनी आपल्या फिर्यादीत म्हटले आहे. याप्रकरणी आठ जणांवर गुन्हा दाखल करण्यात आला असून, पुढील तपास पोलिस उपनिरीक्षक अमोल गुजाळ हे करीत आहेत.
