जळगाव : प्रतिनिधी
चुलत भाचीच्या लग्न समारंभाला नाशिक येथून आलेल्या दीपाली चेतन विसपुते यांच्या पर्समधून दागिने व रोकड, असा एकूण ६८ हजार २०० रुपयांचा ऐवज चोरट्याने लांबविला. ही घटना बुधवार, दि. १४ डिसेंबर रोजी सायंकाळी ५ ते ५.३० वाजेदरम्यान भुसावळ रस्त्यावरील एका हॉटेलमध्ये घडली. महिलेचा भाऊ संदीप देवरे याने रविवारी शनिपेठ पोलिस ठाण्यात तक्रार दिली. त्यानुसार चोरट्याविरुद्ध गुन्हा दाखल करण्यात आला आहे.
चोरट्याने पर्समधून ४ हजार रुपये किमतीची १ ग्रॅम वजनाची सोन्याची मोतीनथ, ७ हजार रुपये किमतीचे २ ग्रॅमचे सोन्याचे कानातील टॉप्स, ११ हजार रुपये किमतीचे ३ ग्रॅमचे सोन्याचे झुमके, १४ हजार रुपये किमतीच्या ४ ग्रॅमच्या सोन्याचे कानातील साखळ्या, ४ हजार रुपये किमतीचे १ ग्रॅमचे कानातील लहान टॉप्स, १७ हजार रुपये किमतीचे ३ ग्रॅमचे सोन्याचे मोतीकुळे, ८ हजार रुपये किमतीचे २ ग्रॅमचे सोन्याचे पॉलिश असलेले फॅन्सी कडे, ७०० रुपये किमतीचा चांदीचा शिक्का, अडीच हजार रुपयांची रोकड, असा एकूण ६८ हजार २०० रुपयांचा ऐवज चोरून नेला. या प्रकरणी पुढील तपास पो.ना.मनोज येवूलकर हे करीत आहेत.
