जळगाव : प्रतिनिधी
येथील चोपडा-धरणगाव रस्त्यावरील मजरेहोळजवळ, जळगावहून चोपडाकडे येणारी ट्रक (एम.एच.१८-ए.पी.४०९६) आणि चोपडा-धरणगावमार्गे जळगाव जाणारी बस (एम.एच.-२०-१४७५) यांची धडक झाली. बुधवारी सकाळी झालेल्या या अपघातात बसमधील २४ प्रवासी जखमी झाले. ट्रकचालक पसार झाला.अपघातातील एकूण १२ जखमींना उपजिल्हा रुग्णालयात दाखल करून घेतले आहे. तर १२ जणांना प्राथमिक उपचार करून सुटी देण्यात आली. याबाबत चोपडा शहर पोलिस स्थानकात योगेश सुभाष पाटील (वय ३२) यांच्या फिर्यादीवरून माल ट्रक क्र.एम.एच.१८.एपी.४०९६ याच्या विरोधात गुन्हा दाखल करण्यात आला आहे. या प्रकरणी पुढील तपास पो.ना.मधुकर पवार हे करीत आहेत.
जखमींमध्ये बसचालक योगेंद्र सुभाष पाटील(वय ३२), देविदास सोनवणे (वय ६०, रा.शिंदेवाडा, चोपडा), गुणवंत पुंजू वाघ (वय ५२, रा.श्रीरामनगर, चोपडा), सुरेश धना पाटील (वय ७०, भावेर,ता. शिरपूर), शितल तुळशीराम गुजर (वय ५०, रा.शिरपूर), सपनाबाई रवींद्र पाटील (वय ४९, रा.वढोदा), लताबाई मधुकर पाटील (वय ४४, मंगरुळ, ता.चोपडा), विमलबाई आनंदा पाटील (वय ६०, रा.विटनेर), जावेद सलीम तेली (वय ३६, सेंधवा), कल्याणी भगतसिंग राजपूत (वय ८), शोभाबाई भिमसिंग राजपूत (वय ७०, रा.चौगाव), मधुकर संतोष पाटील (वय ७०, रा.वढोदा), या १२ जणांना उपजिल्हा रुग्णालयात दाखल केले आहे. जखमींवर डॉ.मनोज पाटील, डॉ.तृप्ती पाटील, डॉ.प्रसाद पाटील, डॉ.सागर पाटील यांनी उपचार केले. चोपडा आगारप्रमुख संदेश क्षीरसागर यांनी १४ जखमींना पाच हजार ६०० रुपयांची तात्काळ रोख स्वरूपात मदत केली.
