जळगाव : प्रतिनिधी
खोलीचा दरवाजा उघडा असल्याची संधी साधत चोरट्यांनी रामदास कॉलनीमधील निरामय अपार्टमेंटमध्ये राहणाऱ्या विद्यार्थ्यांच्या खोलीतून ६० हजार रुपये किमतीचे दोन लॅपटॉप लांबविल्याची घटना उघडकीस आली आहे. या प्रकरणी एका विद्यार्थ्याच्या फिर्यादीवरून रामानंदनगर पोलिसांत गुन्ह्याची नोंद करण्यात आली आहे.
अमळनेर तालुक्यातील धार येथील विशाल पाटील हा शिक्षणासाठी सध्या रामदास कॉलनीमधील निरामय अपार्टमेंटमध्ये मित्र प्रथम सोनवणे, प्रीतम जावळे, विशाल पाटील, पंकज इंगळे, चेतन भिरूड, विश्वेश महाजन, निखिल सावळे, धनश्याम धांडे यांच्यासह राहतो. सोमवारी रात्री पंकज आणि विशाल हे लॅपटॉपवर अभ्यास करीत होते. नंतर त्यांनी आपापले लॅपटॉप टेबलवर ठेवले. मंगळवारी सकाळी सात वाजता विश्वेश व पंकज हे पेपर देण्यासाठी खोलीबाहेर निघाले. मात्र, त्यांनी दरवाजा बंद न करता तो केवळ अडकविला. हीच संधी साधत चोरट्यांनी पंकज आणि विशाल यांचा टेबलवर ठेवलेला लॅपटॉप लांबविला. रामानंदनगर पोलिस ठाणे गाठून तक्रार दिली.
