जळगाव : प्रतिनिधी
अमळनेर किरकोळ कारणातून मारहाण केल्याप्रकरणी मारवाड पोलिस ठाण्यात सात जणांविरुद्ध गुन्हा दाखल करण्यात आला आहे. ही घटना २४ नोव्हेंबर रोजी घडली होती. यातील फिर्यादी पती व पत्नी हे जखमी असल्याने त्यांनी उपचार घेतल्यानंतर याबाबतची फिर्याद पोलिस ठाण्यात दाखल केली आहे.
गोकुळ आनंदा बच्छाव (एकतास, ता. अमळनेर) व दुर्योधन निंबा वाघ यांच्यात शेतात जाण्याच्या वहिवाटेवरून वाद सुरू आहे. या वादातूनच २४ नोव्हेंबर रोजी सकाळी ग्रामपंचायतीजवळ बच्छाव हे बैलगाडीने शेतात जात असताना त्यांना आरोपींनी शिवीगाळ करून हातातील काठीने मारहाण केली. तसेच गोकुळ यांच्या पत्नीला शिवीगाळ करून ठार मारण्याची धमकी देत तिचा विनयभंगही केला.
दरम्यान, या मारहाणीत गोकुळ बच्छाव व पत्नी उज्ज्वला हे जखमी झाले. त्यांनी अमळनेरच्या ग्रामीण रुग्णालयात उपचार घेतल्यानंतर याबाबतची फिर्याद मारवड पोलिस ठाण्यात दाखल केली आहे. त्यानुसार पोलिसांनी दुर्योधन निंबा वाघ, भरत निंबा वाघ, शाम दुर्योधन वाघ, निंबा वाघ, योगिता वाघ तसेच अनिता वाघ यांच्याविरोधात गुन्हा दाखल करण्यात आला आहे.
या प्रकरणात अद्याप कोणालाही अटक करण्यात न आल्याने गोकुळ यांनी बुधवारी पोलिस अधीक्षक कार्यालयात निवेदन दिले असून हा प्रकार सीसीटीव्हीमध्ये कैद होऊनही पोलिस आरोपींना अटक करण्यात चालढकल करत असल्याचे बच्छाव यांनी म्हटले आहे. अधिक तपास हे. कॉ. किशोर पाटील करत आहेत.
