चोपडा : प्रतिनिधी
एका दुचाकी दोन तरुण चोपड्याहून गलंगीकडे जात असतांना हातेड – गलंगी रस्त्यावरील पाटचारीजवळ त्यांना भरधाव वेगात येणाऱ्या मोठ्या ट्रकने जोरदार धडक दिल्याने ते रस्त्याच्या बाजूला फेकले गेले तर समोरून येणाऱ्या मजुराच्या ट्रॅक्टर चालकाने जागीच ब्रेक लावल्याने ट्रॉली देखील पलटी होत त्यातील मजूर जखमी असल्याची प्राथमिक माहिती आहे.
सविस्तर वृत्त असे की, घोडगाव येथील सुरेश कमलसिंग बारेला(वय २६) व कुसुंबा येथील गोलू बारेला(वय १७) हे दोन्ही आपली मोटार सायकल क्रमांक एम.एच.१९.बी.पी.४९४० हिने चोपड्याहून गलंगीकडे जात असताना हातेड – गलंगी रस्त्यावरील पाटचारीजवळ त्यांना मागून ट्रकने धडक दिल्याने ते रस्त्याच्या बाजूला फेकले गेले व त्यांची मोटार सायकल रस्त्यात पडल्याने समोरून येणारे ट्रॅक्टर क्रमांक एम एच १९ डी एस २८१३ या चालकाने समोरील घटना पाहून अचानक ब्रेक दाबले असता ट्रॅक्टरची ट्रॉली देखील पलटी झाल्याचे समजते. सदर ट्रॅक्टर ट्रॉलीमध्ये ऊस मजूर असल्याचे समजते तसेच सदर ट्रॅक्टर ट्रॉली मधील पाच ते सहा मजूर जखमी झाल्याचे समजते तरी मागून धडक देणारा ट्रक व ट्रक चालक फरार झाला असून जखमींवर चोपडा येथील उपजिल्हा रुग्णालयात उपचार सुरू आहे.
सुरेश कमलाकर बारेला हा घोडगाव येथील असून त्याच्यासोबतचा गोलू बारेला हा कुसुंबा येथील असल्याचे समजते. अपघात इतका भयंकर होता की, त्यांची मोटार सायकल चक्काचूर झाली आहे. घटनास्थळी चोपडा ग्रामीण पोलीस स्थानकाचे सपोनी संदीप दुनगहू, पोहेकॉ राजू महाजन, पोहेको लीलाधर भोई, पोना.शशिकांत पारधी, पोकॉ सुनील कोळी यांनी भेट देत जखमींना रुग्णालयात दाखल केले होते.
