अमळनेर : प्रतिनिधी
दुचाकीवरील तरुणांनी घोषणाबाजी केल्याने शहरातील झामी चौकात शनिवारी रात्री दोन गटात दंगल उसळली. यावेळी दगडफेकीत दोन जण जखमी झाले तर ५० जणांवर दंगलीचा गुन्हा दाखल करण्यात आला.
घोषणाबाजी करणाऱ्यांना सचिन अशोक महाजन (२५) यांच्यासह काही जणांनी हटकले असता दगडफेक करत शिवीगाळ करण्यात आली. यात सचिन महाजन व मनोज महाजन हे जखमी झाले. तर मध्यस्थी करण्यासाठी आलेल्यांना दगडांचा मार बसला. यातून महिलाही सुटल्या नाहीत. सचिन महाजन यांच्या फिर्यादीवरुन नावीद शेख, नईम पठाण, गुलाब नबी, साहील आणि अन्य ३० ते ३५ जण (सर्व रा. झामी चौक) यांच्याविरुद्ध गुन्हा दाखल करण्यात आला आहे. तर दुसऱ्या गटातर्फे इम्रान अन्सारी याच्या फिर्यादीवरुन विशाल चौधरी, मनोज ठाकरे, दीपक पाटील, महेश केबलवाला, अजय नाथबुवा यांच्यासह १० ते १५ जणांविरुद्ध दंगलीचा गुन्हा दाखल करण्यात आला आहे. पोलिसांनी तात्काळ घटनास्थळ गाठत परिस्थिती नियंत्रणात आणली.
