शिरूर : वृत्तसंस्था
तालुक्यातील शिक्रापूर येथील बजरंगवाडी येथे एका बापाने त्याची सात वर्षांची मुलगी बेपत्ता झाल्याबाबत पोलिसात तक्रार दिली होती. पोलिस या प्रकरणाचा तपास करत असताना धक्कादायक माहिती पुढे आली आहे. मुलीच्या सततच्या आजारपणातून आणि आर्थिक विवंचनेतून वडिलांनीच खून केल्याची खळबळजनक माहिती समोर आली आहे. सख्या बापच असे कृत्य करू शकतो यावर कुणाचाही विश्वास बसू शकत नाही.
बजरंगवाडी येथून अपेक्षा युवराज सोळुंके (७) ही मुलगी मंगळवारी रात्री बेपत्ता झाली होती. मुलीच्या वडिलांनी शिक्रापूर पोलिसात याप्रकरणी मुलगी बेपत्ता असल्याची तक्रार दिली होती. पोलिसांनी शोध घेतला, मात्र ती सापडली नाही. दरम्यान, सीसीटीव्ही तपासले असता मुलीच्या वडिलांनी मुलीला नदीच्या कडेला नेल्याची माहिती समोर आली. त्यानंतर पोलिसांनी मुलीच्या वडिलांना ताब्यात घेत कसून चौकशी केली. यात त्यानेच मुलीला पाण्यात फेकून ठार मारल्याची कबुली दिली. पोलिसांनी वेळ नदीपात्रात तपासणी केली असताना मुलीच्या चपला आढळल्या. मुलीच्या मृतदेहाचा शोध घेण्याचे काम सुरू असून वडिलाला अटक करण्यात आली.
