पंढरपूर : वृत्तसंस्था
आतापर्यंत आपण पाहिले असेल बुलेट, बाहुबली थाळीनंतर आता 40 गद्दार थाळी आणि 50 खोके एकदम ओके थाळी खवय्यांसाठी लक्षवेधी ठरत आहे. राज्यामध्ये बुलेट थाळी, बाहुबली थाळी अशा अनेक थाळ्या प्रसिद्ध झाल्या. यानंतर आता पंढरपूर- सांगोला रस्त्यावर 40 गद्दार थाळी आणि 50 खोक्के एकदम ओके थाळी प्रवाश्यांसह, पंढरपूर वासियांचे लक्ष वेधून घेत आहे.
मार्केटिंगसाठी कायपण हे आपण नेहमीच पाहत आलो आहोत. अशीच एक भन्नाट कल्पना शिवसेनेच्या पदाधिकाऱ्याने मार्केटमध्ये आणली आहे. पंढरपुरातील हॉटेलमध्ये त्यांच्याकडून 40 आणि 50 रुपयांना थाली देण्यात येत आहे या थालीचे नाव 40 गद्दार आणि 50 खोके असे देण्यात आल्याने महाराष्ट्रभर तिची चर्चा सुरू आहे.
राज्यात सत्तांतर झाले. यानंतर शिवसेनेकडून शिंदे गटाच्या आमदारांना सातत्याने गद्दार म्हणून हिणवले गेले. ह्याच 40 गद्दारांच्या नावाने शाकाहारी थाळी तयार झाली. तर विधानसभेच्या आवारात ’50खोके एकदम ओके’ नावाने झालेल्या घोषणावरुन अनोखी मांसाहरी थाळी तयार करण्यात आली आहे.
विशेष म्हणजे राज्यातील वेगवेगळ्या थाळ्यामध्ये शिवसेनेची 40 गद्दार थाळी आणि 50 खोके एकदम ओके थाळी निश्चितच चर्चेचा विषय ठरत आहे. सांगोला रस्त्यांवर असलेल्या दत्तात्रय यादव आणि बंडू घोडके यांच्या हॉटेल शिवमवर ही थाळी सध्या उपलब्ध आहे. महत्वाचे म्हणजे ह्या थाळीची किमंत 40 रु व 50 रु अशी ठेवण्यात आली आहे.
पंढरपूर तालुका शिवसेनेचे तालुकाप्रमुख संजय घोडके यांच्या संकल्पनेतून ही थाळी निर्माण केली आहे. सांगोला मतदारसंघाचे सेनेचे गद्दार आमदार शहाजीबापू पाटील यांनीही कडवट शिवसैनिकाच्या हातच्या प्रामाणिक अन्नाची चव चाखावी अशी मिश्किल टीपन्नी हॉटेल चालकाकडून होतो आहे. ह्या थाळीवर सध्या खवय्येगिरी चांगलाच ताव मारताना पहायला मिळत आहे.
