जळगाव : प्रतिनिधी
अज्ञात भामट्यांनी अट्रावल शिवारात शेतकऱ्याकडून मोबाइल हिसकावून पळ काढला होता. हा मोबाइल एक तरुण भालोद गावात विक्री करण्याच्या ही माहिती मिळताच एलसीबीने त्यास अटक केली. रोहित मधुकर लोखंडे असे त्याचे नाव आहे.
अट्रावल येथील शेतकरी सुनील निवृत्ती चौधरी हे सांगवी खुर्द येथील शेतात काम करत होते. तेथे आलेल्या दोन भामट्यांनी धाक दाखवून त्यांचा मोबाइल हिसकावून पळ काढला होता. याप्रकरणी यावल पोलिसांत गुन्हा दाखल आहे. यावल पोलिस व जळगाव एलसीबी या प्रकरणाचा तपास करत होते. एलसीबीचे पोलिस निरीक्षक किरणकुमार बकाले यांना भालोद या गावात एक तरुण चोरीचा मोबाइल विक्रीसाठी आल्याची माहिती मिळाली. त्यांनी सहायक फौजदार इनुस शेख इब्राहिम यांच्या पथकाला कारवाईसाठी पाठवले. त्यांनी भालोद येथील रोहित उर्फ बुवा मधुकर लोखंडे (वय १९) याला बसस्थानक परिसरात ताब्यात घेत मोबाइल हस्तगत केला. मोबाइल चोरी केल्याची कबुली त्याने दिली.
