भडगाव : प्रतिनिधी
तालुक्यातील वाडे येथील रहिवाशी इंदुबाई महादु देसले या महिलेची १० ग्रॅम वजनाची ४० हजार रुपयांची सोन्याची पोत, अज्ञात चोरट्यांनी लांबवल्याची घटना भडगाव बसस्थानकात दि. २९ रोजी दुपारी घडली.
याबाबत भडगाव पोलिसांत महिलेचे भाऊ लक्ष्मण पाटील यांनी फिर्याद दिली. त्यानुसार इंदुबाई देसले (रा. कळवाडी, ता. मालेगाव) ही महीला आपल्या माहेरी वाडे येथे भावांकडे पोळा सणाच्या यात्रेला आली होती. २९ रोजी त्या वाडे ते भडगाव बसने दुपारी भडगावात आल्या. महिंदळे येथे आपल्या बहिणीकडे त्या जात होत्या. भडगाव बसस्थानकातून महिंदळे गावी जाणाऱ्या भडगाव ते पारोळा बसमध्ये चढताना अज्ञात चोरट्याने त्यांची पोत लांबवली. महिलेने वाहकाला घटना सांगितली. मात्र, चोरट्याचा छडा लागला नाही. पुढील तपास हवालदार विजय जाधव करत आहेत.
